رواية كاملة بقلم سولييه نصار

تدور في التلاجة علي حاجة تاكلها أنا هكتب الواجب مع الاولاد وياريت تحط فلوس تاني في الفيزا عشان الفلوس قربت تخلص 
فاق من توتره وقال
نعم يا اختي مش لسه حاططلك عشر الإلاف من تلات ايام 
هزيت كتفي وقولت 
مصاريف عيالك كتيرة أنا أعمل ايه !ايه هتحرمهم ولا السنيورة الجديد مقشطاك أول بأول لو مش عارف تصرف عليهم اروح لباباك واقوله علي كل حاجة يمكن هو يصرف علينا ما دام ابوهم مش قادر يصرف عليهم عشان بيصرف علي الستات 

خلاص يا زينب اسكتي هحطلك فلوس مش كل شوية تسمي بدني بالكلمتين دوول 
ابتسمت وهو بياخد مني الفيزا وانا دخلت جوا 
ضحكت وانا سامعة باب البيت بيقفل جامد 
روحت الحمام اخدت دوش علي السريع ولبست الفستان اللي اشتريته جديد وفردت شعري الطويل وحطيت ميكب خفيف وروحت اقعد مع الاولاد عشان اذاكرلهم 
بعد شوية جالي مروان وقف مبهوت وهو بيبصلي قعد مع الاولاد معايا واداني الفيزا كانت عينيه طالعة عليا بس مكنتش مدياله أي اهتمام كنت بذاكر للاولاد ومنشغلة معاهم لما ملقاش أي اهتمام مني قام بزهق وطلع البلكونة 
بعد ما خلصت كنت جعت انا والاولاد قررت اعملهم عشا بسيط عشان يناموا بدري 
عملتلهم شاي بلبن وسيحتلهم جبنة رومي في عيش فينو اكلتنا المفضلة واكلنا كلنا وبعدين ناموا 
غسلت المواعين في المطبخ ولسه هطلع شهقت لما شوفت مروان ابتسم وقال 
وحشتيني 
قصر 
قولتها ببرود فضحك وقال
يعني انتي مش متشيكة كده عشاني 
ضحكت وقولت 
ياااه انت لسه منضجتش يا مروان متعرفش اني دايما بلبس كده في البيت لاني بحب اشوف نفسي جميلة معقول بعد السنين دي كلها مش فاهمني !
مش مهم 
عينيه لمعت بخبث وقال
ولا انتي هتمنعيني عن حقوقي 
استغفر الله أنا !لا طبعا بس الحوار اني بجد قرفانة منك ولو حصل حاجة اعرف هكون مكرهة علي كده ومظنش يا مارو كرامتك هتسمح تلمس واحدة مش طايقاك ولا ايه 
وشه اتجمد وبعد وقال
بما أنك قرفانة مني متجوازني ليه!
ابتسمت بإستفزاز وقولت 
مصدر فلوس كويس جدا يا مارو 
وبعدين سيبته وروحت انام في اوضة الاولاد 
تاني يوم كان إجازة من المدرسة
قررنا نروح انا والاولاد النادي 
حضرتلهم فطار ملوكي ومروان صحي من النوم
سلم علي اولاده ودخل الحمام طلع من الحمام وجرس الباب رن راح عشان يفتح الباب وطول شوية وبعدين سمعت صوت مألوف
لا هدخل 
اتجمدت مكاني وانا بشوف عشيقة جوزي داخلة بيتي 
بيتكم حلو اووي 
قالتها بإبتسامة بجحة 
بصيت علي مروان المتوتر وانتبهت لما بنتي قالت
مين دي يا ماما !
قربت البنت من بنتي تقي وقالت وهي بتلمس شعرها
انا اشرقت يا حبيبي ابقي زميلة بابا في الشغل وهبقي 
بإبتسامة لطيفة قاطعتها

وقولت 
يا أولاد روحي اوضكم يالا وجهزوا نفسكم عشان نروح النادي 
الاولاد سمعوا كلامي فورا وراحوا اوضهم 
بصيت لأشرقت بوش احمر من الڠضب فابتسمت بإستفزاز وقالت
اولادك 
وقبل ما تكمل جبتها من شعرها وصړخت
قولتلك لو قربتي من اولادي ھقتلك